Lucía LÓPEZ MARCO

Catáu intensivo. Semeya: Lucía López

Vaques pastiando en Santoña. Semeya: Lucía López

LES CUOTES LLECHERES Y EL MERCÁUS INTERNACIONAL

Hasta’l pasáu 1 d’abril, la Unión Europea establecía un tope máximu de llitros de lleche de vaca que cada Estáu miembru podía producir. El sistema de cuotes escomencipió’l 1 de xineru de 1986, anque la so implantación n’España fízose unos años más tarde, y supunxo la desapaición de miles de vaqueríes, porque’l consumu n’España taba alredor de los 9 millones de tonelaes y tenía asignáu un volume de producción de namás 4,5 millones de tonelaes, polo que, podríemos dicir que «obligaron» a España a importar la metá de los derivaos lácteos que consumía. El sistema de cuotes llevó a que les ganaderíes que queríen medrar compraren o arrendaren cuota d’otres ganaderíes.

La xustificación p’acabar coles cuotes por parte de la UE foi la previsión de que la demanda de derivaos de la lleche a nivel mundial diba medrar a un ritmu del 2%, y les cuotes diben convertise nuna torga pal crecimientu de la producción n’Europa. Sicasí, estes previsiones nun se cumplieron al empezar a producir China la so propia lleche, lo que fai difícil predicir les sos importaciones futures, y cola decisión de Rusia de dexar de consumir lleche europeo por mor del conflictu con Ucraína. Esta situación supunxo una baxada de precios n’orixe non solo n’Europa, sinón tamién n’otres zones productores como EE UU, Nueva Zelanda o América Llatina, baxando’l preciu del productu final pal consumidor en bona parte del mundu. Nel Estáu español esta cayida del preciu final foi mínima en comparanza cola baxada de precios n’orixe, porque’l preciu nos establecimientos de venta acumula una cayida anual del 4,6%, mientres que n’orixe la mengua ye del 16,9%.

Otru elementu central pa pescanciar la situación del sector nel nuestru territoriu ye la distribución de la ganancia. Mientres qu’en países como Canadá la producción queda con un 54% del marxe de beneficiu, equí la ganancia repártenla la distribución (que lleva ente un 60% y un 90%) y la industria. De forma que, finalmente, quien produció la lleche nun tien nenguna parte d’esi marxe; ye más, munches veces nun se cubren nin los costos de producción.

La diferencia fundamental ente un modelu y otru ta na forma de tomar les decisiones en cada Estáu. Nel casu de Canadá, hai dos instrumentos esenciales. La Comisión de Productos Llecheros del Canadá ye una estructura central col oxetivu de «ufiertar a los productores eficientes de lleche y nata la posibilidá d’algamar una remuneración equitativa pol so trabayu y les sos inversiones y garantizar a los consumidores de productos llecheros una ufierta ininterrumpida, suficiente y de calidá». Pa eso, esiste en cada provincia una Xunta de Negociación de venta de lleche formada poles ganaderíes y el Gobiernu, siendo la so competencia «l’apertura y alministración de los continxentes, la mancomunación de los ingresos, la fixación de precios y el caltenimientu de los rexistros de productores».

Estes Xuntes, onde la industria y la distribución tienen voz pero nun voto, garanticen cubrir los costos de producción, polo que nun faen falta les ayudes económiques. Per otru llau, procuren que la lleche consúmanlo na provincia d’orixe, polo que ye más fácil que la producción s’adapte a la demanda y nun tengan que buscar salida a un escesu de lleche. Tamién ye importante solliñar qu’asina favorez la economía de la rexón y qu’al distribuise en circuitos curtios de comercialización nun baxen namás los gastos de trasporte, sinón que tamién pue ufiertase lleche pasteurizao, de mayor calidá que la UHT, lo más consumío nel Estáu español.

Mientres en Canadá faen la regulación láctea con instrumentos estructurales, descentralizaos y cola participación central del sector productivu, nel Estáu español siguimos funcionando con alcuerdos puntuales según el momentu. El pasáu 23 de setiembre firmóse nel Ministeriu d’Agricultura, Alimentación y Mediuambiente un alcuerdu lácteu que nun foi apoyáu poles dos organizaciones agraries mayoritaries, COAG y UPA, que representen al 70% de les ganaderíes, pero sí pola industria y la distribución. Esti alcuerdu nun incluí un preciu mínimu pa la lleche que garantice cubrir los costos de producción, estimaos ente 34 y 38 céntimos por llitru de lleche (de fechu, el pasáu mes d’ochobre, el preciu mediu estatal del llitru lleche yera de 0,309 €, polo que nun s’algamen los costos de producción). Gracies a esi alcuerdu lácteu preséntase un paquete d’ayudes de 20 millones d’euros, espublizaes el 28 de setiembre nel BOE, destinaes a aquelles ganaderíes que reciban menos de 0,285 € por llitru. Teniendo en cuenta que son la industria y la distribución quien fixen los precios, en realidá l’ayuda ye pa estes, que compren a precios per baxo de coste, y non pa les ganaderíes.

LA INDUSTRIA Y LA DISTRIBUCIÓN VERSUS EL MUNDU RURAL

Asina que nos alcontramos que, nos postreros 30 años, el sector lácteu español cambió radicalmente, pasando de tener capacidá pa producir tola lleche que consumía a tener qu’importar la metá de los lácteos, desapaeciendo d’esta manera manches vaquerías familiares. Amás, paradóxicamente, la decisión actual d’eliminar les cuotes pa que nun haya topes de producción supón un impulsu nuevu a les granxes intensives, que mayoritariamente busquen instalase en zones de cereal pa tener meyor accesu a los piensos colos qu’alimenten a los sos animales.

Si la industria, pela so parte, buscando la maximización de los beneficios, tiende a centralizar aún más les sos compres nestes zones de concentración de grandes vaqueríes, ¿pa qué van recoyelo en pequeñes ganaderíes de les zones tradicionalmente productores?

Per otru llau, l’actividá ganadera tradicional tuvo siempre diversificao –xuntábase la producción llechera cola güerta familiar y otres xeres- mientres que nos postreros años munches vaqueríes tecnificáronse, intensificando y medrando la producción a costa de grandes inversiones n’instalaciones, maquinaria y cuota. El resultáu ye una especialización productiva, convirtiendo la producción llechera na so única fonte d’ingresos. Entós, agora que namás viven de les vaques, ¿qué puen facer si yá nun ye vidable?

El fechu de que tean favoreciendo una ganadería non apegada a la tierra y tean acabando con un modelu tradicional a base de pastu, nun implica namás dexar de producir lleche a menor costu, sinón tamién de mayor calidá, pues la lleche de vaques alimentaes con pación y forraxe tien mayor conteníu d’ácidos grasos insaturaos, que son más beneficiosos pa la salú, y más antioxidantes. Ye dicir, ye una lleche muncho más saludable, característica que pidi’l mercáu, y más sostenible dende’l puntu de vista mediuambiental. Esto ye perimportante si tenemos en cuenta que dende l’añu 2000 el consumu de lleche líquido n’España baxó un 30%, principalmente en beneficiu de la lleche vexetal, que ye presentada y percibida como más sana.

Per otru llau, la flora y la calidá del pastu varía según la época del añu, lo que fai posible ufiertar una variedá alta de productos tresformaos, principalmente quesu, d’una gran calidá tanto organoléptica como nutricional. Na midida que gane tarrén la ganadería intensiva, los pastos, les praderes, y el paisaxe como lu conocemos agora, dirá desapaeciendo, perdiéndose con él la flora y la fauna locales y dexando de ser un atractivu turísticu.

Ún de los compromisos recoyíos nel alcuerdu lácteo ye la «promoción del consumu de lácteos españoles». Parez una definición confusa al empar qu’insuficiente, pues vemos que lo que tenemos nel mercáu ye más lleche producío de forma intensivo a base de piensu en bona midida fechu con soya tresxénico, d’orixe nada español. Si realmente se quier afalar el consumu y la economía local, ¿nun habría qu’apostar por aquelles ganaderíes familiares que nun producen namás lleche de mayor calidá, sinón que tamién cuiden el paisaxe y fixen población nel escaecíu mundu rural? ¿Nun tendría que ser prioridá que la industria pague un preciu que cubra los costos de producción, dignificando esta actividá, frente a dar ayudes pol baxo preciu qu’industria y distribución imponen? ¿Nun será que lo que quieren promover son les ventes y los ingresos de la última parte de la cadena engañando a la xente consumidor? ¿Por qué nun pensamos en polítiques parecíes a les de Canadá onde la parte productora ta nel centru de les decisiones?

Por si too esto fuere poco, l’aprobación del Alcuerdu Tresatlánticu pa el Comerciu y la Inversión ente los EE.UU. y la Unión Europea, van ser les grandes granxes d’Oregón, con más de 60.000 vaques alimentaes con piensos tresxénicos y estimulaes con hormones de crecimientu, les que ganaríen el pulsu a la nuestra producción.
Analizar cómo tan tratando’l sector llecheru n’Europa ye un anticipu de cómo van tratar los demás sectores agrarios. La tendencia ye globalizar cada vez más el mercáu de lleche, impulsando una ganadería con cada vez menos bienestar animal, basada en materies primes quilométriques y con mano d’obra barato, en vez d’apostar por una producción local, sostenible y que fixe población nes zones rurales.

PASÁU, PRESENTE Y... ¿FUTURU?

La ganadería tradicional ye una de les actividaes que más población fixa nel mediu rural, pero tando’l panorama d’esta manera, ¿quién va querer incorporase? Si tenemos en cuenta la falta de servicios, l’aislamientu al que se somete al mundu rural y les dificultaes pa iniciar actividá nel sector primariu, ye normal qu’angüaño namás el 5% de les persones actives n’agricultura y ganadería tenga menos de 35 años, y qu’un 33% sía mayor de 65. Namás un 3,5% de quien percibe la PAC tien menos de 35 años.

El futuru de la ganadería pasa por siguir aprovechando los recursos de la redolada pa consiguir non namás productos de la máxima calidá, sinón tamién el caltenimientu d’un paisaxe ancestral que lleva sieglos viviendo n’armonía gracies a la ganadería estensiva. La clave ye integrar un bon modelu productivu a pequeña escala, diversificáu y xuntar la tresformación artesanal cola venta en circuitos curtios. Anque les alministraciones favorecen otros intereses a la sostenibilidá ecolóxica y económica del nuestru mediu rural, lo cierto ye que la ciudadanía cada vuelta ta más concienciao con una serie de valores relacionaos col bienestar animal, el mediuambiente y la calidá de los alimentos que consume.
Hai que ser consciente de que si lleguemos hasta equí, ye en buena midida pola fuercia de la gran industria y la so influencia sobre les nuestres alministraciones. ¿Cómo contrarrestamos esti poder? Les movilizaciones qu’estos meses fueron convocándose per toa Europa demuestren qu’una articulación del sector productivu ye fundamental, sí, pero tamién l’averamientu d’esti a la ciudadanía pa ganar la so complicidá. Ensin dulda, ye un tema que nos afecta independientemente de tar nel mediu rural o la ciudá.